【Kongner編輯室】
瘋子愷：校園如何去政治化？
踏入九月份，又到了每年一度嘅開學日，本人在此先祝各位學生學業進步，順順利利。
今年開學嘅情況同以往唔太一樣，就正如啱啱過咗嘅呢個暑假一樣，好多學生都意識到自己與社會密不可分嘅關係，經歷咗一啲學校唔會教到嘅公民意識覺醒，所以喺開學日都紛紛響應罷課行動。
罷課相關嘅嘢其實喺尋晚心事台我同美茄（米迦）都有講到，但咁啱諗起重有嘢未曾談及，所以就決定喺呢度簡單咁表達下我嘅一啲個人感想。
開學前一星期以教育局局長楊潤雄為首嘅教育界人士已經旗幟鮮明地表示將會反對學生罷課。而喺8月23日，教聯會主席黃錦良亦於文匯報撰寫題為《抵制校園政治化，向罷課大聲說「不」》一文。而當本人睇見又有所謂教育界人士，名為防止「校園政治化」為藉口，實為為政府護航，就覺得極之可笑。
關於教育制度嘅功能，其中一樣就係「社教化」，實質亦係灌輸意識形態俾下一代嘅過程。而就「反罷課」呢一個立場，呢班所謂教育界人士毫不掩飾地暴露出建制一方於政治問題上果種由上而下既打壓。為遏止學生萌生出對制度既反思，經常利用「校園不是政治角力場」、「散播仇恨種子」等等諸如此類嘅言論將學生對社會既關心妖魔化。無他嘅，原來黃錦良佢重身兼政協貴州省委員會委員等多個職銜。口口聲聲講教育應該去政治化既時候自己卻有政治立場，簡直就係「只準州官放火，不許百姓點燈」。
事實上學校越要建立出威權既姿態去禁止學生接觸政治，對學生來講反效果只會越大，更何況喺呢種連傻既都睇得出係盲撐政府既論述，就好似禁止校園內討論港獨亦只係鴕鳥政策，港獨思想並唔會因爲咁而淡出世界舞台。當然啦，都有可能係佢地評估過後，發現自己根本上理虧，所以先唔比講港獨。
因此喺呢個層面上面，問題根本不在於校園係咪要「去政治化」，而其實校園本身都係一個政治體現既場所，作用係潛移默化咁去「培育」學生對政治權威嘅服從。「去政治化」亦都只係一個天真嘅謊言。呢啲咁嘅教育界從業員雖然唔會明目張膽地宣傳政治理念，但其實就已經透過文化霸權令學生跟隨佢地嘅意識形態，所以一個有政治背景同目的嘅人講嘅「去政治化」，簡直就係戇居！
不過，我今晚都會準時12點正去打芒亨去一去政治化先，無咩事唔好搵我啦！而本人亦都保證下次出文會再輕鬆啲同短啲。
啊重有嘅就係聽日有條正片出，一定要睇，唔睇走寶！所以就記得留意我哋YouTube Channel嘅新上架影片喇！
（本欄逢周一、四更新。敬希讀者垂注）
Search